धौलागिरी अञ्चल अस्पताल बागलुङमा सुत्केरी उपचार लापर्वाहीका कारण सुत्केरीको अवस्था गम्भीर

Today Pokhara
0Shares

पोखराप्लस संवादाता

धौलागिरी अञ्चल अस्पताल बागलुङमा सुत्केरी महिलाको अप्रेशनमा भएको लापर्वाहीका कारण अवस्था गम्भीर बनेपछि काठमाडौंको ग्रान्डी अस्पतालमा उपचार भइरहेको पिडितका आफन्तले जनाएका छन् । बागलुङ जिल्ला जैदी ६ निवासी अनिता पुर्जाको मिति २०७३ माघ २६ गते धौलागिरी अञ्चल अस्पतालमा डेलिभरी गराउने क्रममा अप्रेशन भएको केही घण्टापछि आन्तरिक रक्तश्राव भएर बेहोस बनेपछि पुर्जालाई पोखरा रिफर गरिएको थियो । पोखरामा पनि उपचार हुन नसके पछि सुत्केरी पुर्जालाई तत्काल हेलिकप्टर मार्फत काठमाडांैमा लगिएको थियो र अहिले ग्राण्डी अस्पतालमा महंगोमा उपचार भैरहेको छ । आर्थिक अवस्था कमजोर भएकी पीडित सुत्केरीको थप उपचारका लागि उनका आफन्तले विभिन्न क्षेत्रमा सहयोगको आह्वान समेत गरेका छन् ।


घटनाको उचित छानबिन हुनुपर्ने भन्दै पीडित सुत्केरी अनिता पुर्जाका देवर ध्रुब राना मगरले एक प्रेस विज्ञप्ती प्रकाशित गरेका छन् । घटनाको बारेमा अस्पताल प्रशासन, डाक्टर र व्यवस्थापकहरू बीच पटकपटक छलफल गर्दा समेत वेवास्ता गरेको रानामगरको गुनासो रहेको छ । घटना सम्बन्धमा समयमै छानविन गरी आवश्यक कारवाही र उचित क्षतिपूर्तिको माग समेत उनका आफन्तले गरेका छन् ।
धौलागिरी अञ्चल अस्पताल विकास समितिका अध्यक्ष मन्जेसबम मल्ल, अस्पतालका सुपरिटेन्डेन्ट डा. सागर राजभण्डारी र पीडितका आफन्तहरुबीच भएको वार्ता विना निष्कर्ष टुंगिएपछि नागरिक समाजले घटनाका सम्वन्धमा चासो लिन थालेको हो । उता धौलागिरी अञ्चल अस्पतालका मेडिकल सुपरिटेण्डेन्ट डा.सागर राजभण्डारीले बिरामीको उपचारमा लापरवाही नगरेको बताउदै १० हजार मध्ये एक जनालाई त्यस्तो समस्या हुने बताए । डा. राजभण्डारीले अस्पतालका डाक्टरहरूले नै रक्तदान गरेर पीडित सुत्करीलाई पोखरा पु¥याएको बताएका छन् ।