एमालेको चुनावी गीत सार्वजनिक दर्जनौं कलाकारहरु एमाले प्रवेश

Today Pokhara
0Shares

सोमबार पोखरामा आयोजित एक कार्यक्रमका बीच ६७ जना लोकदोहोरी कलाकारहरु नेकपा एमाले समर्थित प्रगतिशिल लोक दोहरी गीत समन्वय समिति तथा राष्ट्रिय जनसाँस्कृतिक महासंघमा प्रवेश गरेका छन् । नेपाली कांग्रेस समर्थित नेपाल साँस्कृतिक संघ सम्बद्ध लक्ष्मी सुवेदीको नेतृत्वमा कास्की लगायत प्रदेश नं. ४ का विभिन्न जिल्लाबाट उनीहरु एमाले प्रवेश गरेको महासंघ प्रदेश नं. ४ का सचिव सुवास मल्लले जानकारी दिए ।
कार्यक्रमको उद्घाटन गर्दै नेकपा एमाले प्रदेश नं. ४ का ईञ्चार्ज किरण गुरुङ्गले सय मिनेटको भाषण भन्दा चार मिनेटको गीत शक्तिशाली हुने भन्दै कलाकारहरुको योगदानलाई प्रशंसा गरे । त्यसै गरी सांसद रविन्द्र अधिकारीले संसदको विकास समिति मार्फत कलाकारहरुले सिर्जना वापत पाउने रोयल्टीको ग्यारेन्टी गर्ने काम आफुहरुले अगाडी बढाएको भन्दै नेकपा एमाले कलाकारहरुको पक्षमा रहेको आश्वस्त पारे । कार्यक्रममा नेकपा एमाले प्रदेश सह ईञ्चार्ज गणेश तिमिल्सिना, सांसद सीता गिरी ओली, नेकपा एमाले कास्कीका सचिव दामोदर बैरागी, महासंघ प्रदेश नं. ४ का ईञ्चार्ज मनकुमार श्रेष्ठ, वरिष्ठ लोक दोहोरी कलाकारहरु प्रजापति पराजुली र पुरुषोत्तम न्यौपाने लगायतले बोलेका थिए ।


कार्यक्रममा कलाकारहरुले ‘आयो एमाले’ बोलको चुनावी गीत पनि सार्वजनिक गरेका छन् । जीवन दाहाल र नारायण बाँस्तोलाको रचना रहेको सो गीतमा जीवन दाहाल, सुरेन्द्र गुरुङ्ग, कृष्ण गुरुङ्ग, लक्ष्मी नेपाली लगायतका कलाकारहरुको स्वर रहेको छ । साथै कार्यक्रममा महासंघ प्रदेश नं. ४ ले प्रकाशन गरेको भित्ते पात्रो पनि विमोचन भएको भित्ते पात्रो प्रकाशन समितिका संयोजक लक्ष्मण तिमिल्सिनाले जानकारी दिए ।


कार्यक्रममा कलाकारहरु कृष्ण गुरुङ्ग, लक्ष्मी नेपाली, शिवहरी ढुंगाना, टेक क्षेत्री, सविना गुरुङ्ग लगायतका कलाकारहरुले आफ्नो सांगितिक प्र्रस्तुती दिएका थिए भने प्रदेश नं. ४ का विभिन्न जिल्लाहरुबाट करिब ४०० कलाकारहरुले सहभागिता जनाएका थिए ।
कार्यक्रम समितिका प्रदेश नं. ४ का अध्यक्ष जीवन दाहालको अध्यक्षता तथा महासंघ कास्कीका अध्यक्ष कृष्ण भण्डारीको सञ्चालना सम्पन्न भएको थियो ।