अनाथ बालबालिकाको सहयोगार्थ हङकङमा “खै ओ म्ही थेबा”

गुरुङ चलचित्रका स्थापित निर्देशक सुवास गुरुङको “खै ओ म्ही थेबा” अर्थात् “आयो है ठूलो मान्छे” हङकङमा प्रदर्शन गरिने भएको छ । गुरुङ भाषा तथा संस्कृतिमा आधारित सो चलचित्र ७ जनवरीका दिन याउमातेइ कम्युनिटी हलमा प्रदर्शन हुने भएको हो ।
१५ वर्ष अगाडि निर्माण भएको “म्ही थेबा”कै कथा वस्तुमा आधारित दोश्रो भागको रुपमा “खै हो म्ही थेबा“ नेपाललगायत संयुक्त राज्य अमेरिका र बेलायतमा प्रदर्शन भइसकेको र अष्ट्रेलियामा पनी प्रदर्शनको तयारीमा रहेको निर्देशक गुरुङले बताउनुभएको छ ।
सो चलचित्रको विशेष प्रदर्शनबारे हङकङको जोर्डनस्थित चुम्लुङ हिममा आयोजित जानकारी सभामा निर्देशक गुरुङले यो चलचित्रले रगत, भेषभूषा र उसको शरीर नेपाली भए पनि गर्व गर्ने ऊसँग नेपाली नागरिकता नभएको कथावस्तुलाई उठान गरेको बताउनुभयो । चलचित्र प्रदर्शनबाट उठेको केही रकम काठमाडौंको अनाथ बालबालिकाहरूलाई आश्रय दिएर लालनपालन गर्ने “माया घर”लाई सहयोग गर्ने गुरुङको भनाइ छ ।
हातमुख जोड्नका लागि काम नगरी नहुने हङकङ जस्तो व्यस्त शहरमा बसेर पनि आफ्नो जातिको गुरुङ संस्कार र संस्कृतिमा आधारित धेरै चलचित्र निर्माण गरिसकेका निर्देशक गुरुङले गत वर्ष नेपाल गएर भेडी गोठाले, कुटुम्बेरी साइनो र “खै हो म्ही थेबा”को सम्पूर्ण काम सकेर हङकङ फर्किनुभएको थियो । “जहाँ इच्छा त्यहा उपाय” भनेझैँ सबै कामको तर्जुमा मिलाएर आफू विदेशमै बसेर भए पनि गुरुङ जातिको संस्कार र संस्कृतिमा आधारित अर्गानिक चलचित्र निर्माण गरेर भाषिक र सांस्कृतिक उत्थानमा अझै सक्रिय भएको उदाहरण पेश गर्नुभएको छ ।
पछिल्लो सामयमा निर्माण भएका मूलधारको केही नेपाली चलचित्र छोडेर अधिकांश चलचित्र निर्माण प्रायः हलिवुड र बलिउडको नक्कल गरेर निर्माण हुने हुँदा हामीले मूलधारको नेपाली चलचित्रमा हाम्रो भाषा, संस्कार र संस्कृतिको अर्गानिक कथावस्तु प्राप्त गर्न नसकिने हुँदा आफू मूलधारको नेपाली चलचित्र निर्माण भन्दा गुरुङ जातिको संस्कार र संस्कृतिमा आधारित चलचित्र बनाउने तर्फ लागेको उहाँले बताउनुभयो ।
निर्देशक गुरुङ भन्नुहुन्छ, “आर्थिक हिसाबले गुरुङ जातिको चलचित्र निर्माण गर्दा मूलधारको नेपाली चलचित्रको जस्तो फाइदा नभए पनि भाषा,संस्कार र संस्कृति लोप हुँदै जाने क्रममा भोलीका नयाँ पिंढीले चलचित्र हेरेर भए पनि आफ्नो जतिको बारेमा केही जान्ने अवसर मिलोस् भनेर लागेको हुँ ।” कुनै दिन गुरुङ चलचित्रले पनि ओस्कार अथवा कुनै अन्तर्राष्ट्रिय अवार्डको लागि नोमिनेशन हुन पुग्यो भन्ने साेंचले आफूले अगाडि बढेको बताउनुभयो । आफ्नै आफ्नै गाउँ ठाउँको विभिन्न जातजातिको भाषा, संस्कार र संस्कृतिमा आधारित चलचित्र निर्माण गर्दा वास्तविक अर्गानिक चलचित्र निर्माण हुने उहाँको भनाइ छ ।
गुरुङ संस्कार र संस्कृतिमा आधारित चलचित्र भए पनि नेपाली भाषामा निर्माण भएको हुँदा चलचित्रले सम्पूर्ण दर्शकहरूलाई आकर्शित गर्ने निश्चित छ । सूर्य गुरुङ (हङकङ), गोपाल गुरुङ (युके), वसन्त गुरुङ (सोमालिया), लीला गुरुङ र खुशी गुरुङ (हङकङ)ले “खै ओ म्ही थेबा” चलचित्रको निर्माण गर्नुभएको हो ।
जानकारी सभामा “खै ओ म्ही थेबा” चलचित्रको पोस्टरलाइ निर्देशक सुवास गुरुङ, निर्माता सूर्य गुरुङ, मिलन डी.जी. इन्टरनेशनल प्रालिका अध्यक्ष तथा चलचित्र “भेडी गोठाले”का कार्यकारी निर्माता दुर्गा गुरुङ “मिलन”, नायक विश्वास गुरुङ, गीतकार बज्रकुमार थुलुङ राईले पोस्टर सार्वजनिक गर्नुभएको थियो भने कार्यक्रमको सञ्चालन लक्ष्मी गुरुङले गर्नुभएको थियो ।